BUSABOS SA GULONG NG PAGGAWA

Ang  ating mga bayaning mangagawa sa harap ng kahirapan

Natutong magtiis, upang tiyan ng pamilya’y malamnan

Magbanat ng buto, mula umaga hanggang kinagabihan

Kapalit ng ilang sentimong barya na hindi man lang sasapat.

Kadenang bakal na gumagapos na sa ating lipunan

Mga kaawa-awang pobreng minsan ay nilalamangan

Nang ilang mga taong ganid at pahirap sa ating lipunan

Minsan di pa nakuntento’t binubusabos pa ang ating bayan.

Tayong mga Pilipino, mahirap, ngunit iyon ang katotohanan

Mga biktima ng mga busabos ng gulong sa paggawa

Ating inosenteng kamalayan, na ginagamit upang pagsasaan

Nitong mga taong manhid na ang awa sa kanilang kapwa.

Ang ating matagal ng adhika ay makamtan ang magandang bukas

Isang maunlad at progresibong bayan na walang tunggalian

Walang pang-aalipin sa kapwa at lahat ay nagbibigayan

Tila isang panaginip na lamang na ating pinakaaasam.

Hanggang ang ating bayan ay lugmok sa katiwalian at kahirapan

Natitiyak kong, ang lahat ng ito’y walang patutunguhan

Sa mgap atuloy na suliranin na tila wala nang katapusan

Dito sa ating mahal na Inang  busabos na sa paggawa.