Ang Tao sa Iisang Tanghalan

ANG TAO SA IISANG TANGHALAN

Ang bawat tao sa mundo ay nasa iisang tanghalan

Iisa ang saliw ng karakter na ginagampanan

Ang makibaka sa mundo hanggang kamatayan

Umukit ng  kapalaran sa hiwaga ng sangkatauhan.

Ang bawat tao ay nasa iisang tanghalan

Ano man ang iyong ngalan, katayuan at lahing pinagmulan

Tayo dito sa mundo ay artistang umuukit ng pangalan

Magpunyagi man o madarang sa isang dipang kapalaran.

Ikaw? Ako? Tayong lahat na nabubuhay sa mundo

Tila isang nililok na sining sa ganda't katangian

Hinuhulma sa gampaning may natatanging kakayahan

Kakayahang tunay na siyang ipinagkatiwala.

Tayong lahat at nasa iisang tanghalan

Tanghalang sumusubok sa ating napiling daan

Isang pelikulang may dalang lungkot at kasiyahan

Nasa bawat wakas ng plaka ay may aral na nilalapatan.