Mga alala sa isang pangako

MGA  ALA-ALA SA ISANG PANGAKO

Ni Reggie Ibarreta

Liham na sinulat sa papel, na itinago sa lumang baul

Sa paglipas ng panahon ay nalimot na ang kahapon

Kasabay din ng hanging naglaho sa dantaon

Ang mga pangakong nilisan na ng panahon.

Si Inang na nasa dapithapon na ng kanyang buhay

Pilit sinasariwa ang bawat araw na sa kanyang lumisan

Mga taong nakadaupang palad niya sa pagkabata

Mga naging kaibigan at mga minamahal sa buhay.

Mga taong lumisan na laging buhay sa isipan

Sa mga matatamis na pangako sa nagdaang kabataan

Na lalaging walang iwanan sa hirap o ginhawa man

Nagsimula sa kaibigan hanggang naging magkatipan.

Ang oras man ay lumilipas at taon ay lumisan

Pangako'y mananatili sa habang panahon

Pumanaw man at ang isa'y unang lumisan

Pangako'y mananatili hanggang kamatayan.

Pangako ng pag-ibig hanggang sa kabilang buhay

Mananatiling tapat sa nililiyag magpakailanman

Sa dalawang taong dalisay na nagmamahalan

Kahit dikta ng panahon ay  hindi mapipigilan.