Mga Anak ng Bayan

MGA ANAK NG BAYAN

Ni Reggie Ibarreta

Sa gitna ng kahirapan ay natutong lumikha

Nang mga kaisipang ang layon ay pagpuksa

Sa mga kawatang nagmamaneobra nitong bayan

Silang mga bingi at ganid sa karaiingang bayan.

Mga anak ng bayang natutong gumamit ng dahas

Nag-armas upang ituwid ang mga kamalian

Mga ideolohiyang pulitikal na pakana ng kawatan

Nasang putulin at baguhin ang sistemang lipunan.

Welga dito! Welga doon! Yan ang tabing ng lipunan

Sa bawat instutusyong kumakatawan sa ating bayan

Laganap na krimen at hocus pocus ay lantaran

Minsa'y huli na! Matapang pa! itinatanggi pa.

Gayon na lamang ba itong ang takbo ng kasaysayan?

May pag-asa pa ba tayong aasahan sa ating lipunan

Pagkat kung sino pa ang mabuti ay siya pang namamatay

Silang bayaning kabataang nag-alay ng kanilang buhay.

Kami ay mga anak ng bayan ang nasa'y pagbabago

Hindi isang utopiang tulad ng mga nasaisip ninyo

Sa mga salaping inyong kinakamkam

katumbas nito ang libo-libong sawi sa kahirapan.

Isang pagtatamang tayo ay demokratikong bansa

Ngunit dinastiya ang siyang namumuhunan

Bayang ang ugat ng sakit mula pa sa kasaysayan

Kaming kabataang minamana ang maling gawa ng bayan.

MABUHAY ANG MGA ANAK NG BAYAN!